‘அரிச்சந்திர புராணம்’ என்னும் இந் நூலை தமிழில் விருத்தப் பாடல்கள் வடிவத்தில் இயற்றியவர் ‘நல்லூர் வீரகவிராயர்’ என்பவர். இந்நூல், திருப்புல்லாணிக் கோயிலில் பெருமாள் சந்நிதியின் முன்னால் உள்ள சக்கரதீர்த்தக் கரையிலுள்ள மண்டபத்தில் சாலிவாகன சகாப்தம் 1446-ஆம் ஆண்டில் அரங்கேற்றப்பட்டது என்பது சிறப்புப் பாயிரத்தால் விளங்குகிறது. எனவே, கி.பி.1523-ல் இந்த நூல் அரங்கேற்றம் செய்யப்பட்டுள்ளது என்பதை அறிய முடிகிறது. அரிச்சந்திரன் கதைதானே, எனக்குத் தெரியும் என்று நாம் அலட்சியமாக இந்த நூலை ஒதுக்கிவிட முடியாது. படித்துப் பாருங்கள்; உள்ளொளி கிடைக்கும். வாழ்க்கையில் எத்தனை துன்பங்கள் ஏற்பட்ட போதிலும் தர்ம வழியில் பொய் கூறாமல் நடக்க வேண்டும் என்ற விருப்பம் உண்டாகும். நம்மால் அப்படி நடக்க முடிகிறதோ... இல்லையோ, குறைந்த பட்சம் ஆசையாவது ஏற்படும்.