இந்தியா கிராமங்கள் நிறைந்த நாடு. விவசாயமே இந்தியாவின்உயிர்நாடி என்று தேசத்தலைவர்கள் முழங்கிய காலம் இன்று இல்லை. இன்றும் இந்தியா கிராமங்கள் நிறைந்த நாடுதான். ஆனால் அந்தக் கிராமங்களும் இன்று நகர வாழ்வின் அவலங்களை சுவீகரித்துக்கொள்ளத் தொடங்கிவிட்டன. கிராம மக்களின் நடை, உடை, பாவனைகளில் கடந்த பத்து ஆண்டுகளுக்கும் முன்பிலிருந்தே பெருத்த மாற்றங்கள் புகுந்துவிட்டன. கிராம மக்களிடம் காணப்பட்ட அப்பழுக்கற்ற கிண்டல், கேலிப் பேச்சுகள் இன்று அறவே கிடையாது. கிராமங்கள் மண்ணின் மனத்தை இழந்து தவிக்கின்றன. இங்கு வாழும் மக்களும், நாகரிகமாக நடந்து கொள்வதாக நினைத்துக் கொண்டு அடுத்தவர்களின் வாழ்க்கைப் பிரச்னைகளைப் பற்றிக் கண்டும் காணாமல் செல்கிறார்கள். அவ்வாறு பிரச்னைகளில் சிக்கித் தவிப்பவர்கள் அப்பாவி ஏழைகளாகவும், குடிசை வீடுகளில் வாழ்ந்து அல்லாடிக் கொண்டிருப்பவர்களாகவுமே உள்ளனர் என்பது இதில் கவனிக்கத்தக்கதாகும். நம் முன்னோர்கள் நமக்கென வகுத்துத் தந்த பாரம்பரியப் பண்புகளை, நாகரிகம் என்ற பெயரில் மூடி மறைக்க முயல்வதிலிருந்து இன்றைய இளைஞர்களை விடுவித்து, அவர்களை முறையாக ஆற்றுப்படுத்த இது அவசியம் . அதற்கான என் சிறு முயற்சியே இந்நூல்.